नार-पार गिरणा प्रकल्पातून धुळे तालुक्यातील बोरी पट्ट्यास पाणी द्या; माजी आमदार कुणाल पाटील यांची जलसंपदा मंत्री यांच्याकडे मागणी

नार-पार गिरणा प्रकल्पातून धुळे तालुक्यातील बोरी पट्ट्यास पाणी द्या; माजी आमदार कुणाल पाटील यांची जलसंपदा मंत्र्यांकडे मागणी

धुळे: नार-पार-गिरणा नदीजोड प्रकल्पाचा लाभ धुळे तालुक्यातील बोरी परिसरातील गावांना सिंचनासाठी मिळावा, तसेच गिरणा-पांझण डाव्या कालव्याचे वाढ व विस्तारीकरण करण्यात यावे, अशी आग्रही मागणी माजी आमदार कुणाल पाटील यांनी जलसंपदा मंत्री गिरीश महाजन यांच्याकडे केली आहे. या संदर्भात त्यांनी मंत्री महाजन यांची भेट घेऊन त्यांना सविस्तर मागणीचे निवेदन दिले.

'बोरी' पट्ट्यातील शेतीसाठी सातत्याने पाठपुरावा

माजी आमदार कुणाल पाटील यांनी सांगितले की, धुळे तालुक्यातील बोरी नदी पट्ट्यातील गावांना सिंचनासाठी पाणी मिळावे यासाठी गेल्या अनेक वर्षांपासून त्यांचा सातत्याने पाठपुरावा सुरू आहे. आता या महत्त्वाकांक्षी प्रकल्पाच्या अंमलबजावणीला गती मिळाली असून जलसंपदा विभागाने ४ हजार ११६ कोटी रुपयांच्या कामांना कार्यारंभ आदेश (वर्क ऑर्डर) दिले आहेत. या पार्श्वभूमीवर, धुळे तालुक्यातील बोरी पट्ट्यातील शेतीला या प्रकल्पातून पाणी उपलब्ध करून देण्यात यावे, अशी मागणी त्यांनी केली आहे.

१ लाख २३ हजार एकर क्षेत्र सिंचनाखाली येणार

नार-पार गिरणा नदीजोड प्रकल्पाच्या पहिल्या टप्प्यात १०.६४ टीएमसी अतिरिक्त पाणी उपलब्ध होणार आहे. या पाण्यातून नाशिक व जळगाव जिल्ह्यातील सुमारे १ लाख २३ हजार ७९० एकर क्षेत्र सिंचनाखाली येणार आहे. धुळे तालुक्यातील काही गावे चाळीसगाव, मालेगाव व पारोळा तालुक्यांच्या सीमेलगत असल्याने आणि बोरी नदी पट्ट्यात येत असल्याने, या योजनेचा लाभ या गावांनाही मिळावा यासाठी मंत्रालय पातळीवर प्रयत्न सुरू असल्याचे कुणाल पाटील यांनी स्पष्ट केले.

सध्या पाण्याचे प्रमाण अत्यंत अल्प

गिरणा, मोसम, बोरी आणि कान्होळी नदी खोऱ्यातील भाग कायम दुष्काळग्रस्त राहिला आहे. धुळे तालुक्याच्या सीमेवरून जाणाऱ्या गिरणा-पांझण डाव्या कालव्याद्वारे बोरी पट्ट्यातील काही गावांना सिंचनासाठी पाणी दिले जात असले, तरी त्याचे प्रमाण अत्यंत अल्प आहे. त्यामुळे अनेक क्षेत्रे अजूनही सिंचनापासून वंचित आहेत. यावर कायमस्वरूपी तोडगा काढण्यासाठी नार-पार-गिरणा प्रकल्पाचे पाणी धुळे तालुक्यातील गावांना मिळणे अत्यंत आवश्यक आहे.

६ ते ७ हजार कोटींचा खर्च अपेक्षित

उत्तर महाराष्ट्रासाठी जीवनदायिनी ठरणाऱ्या या प्रकल्पामुळे संपूर्ण प्रदेशात जलक्रांती घडेल, असा विश्वास व्यक्त केला जात आहे. नाशिक जिल्ह्यातील नार-पार परिसरातील अतिरिक्त पाणी गिरणा खोऱ्यात वळविण्याची ही योजना असून, या संपूर्ण प्रकल्पासाठी सुमारे ६ ते ७ हजार कोटी रुपयांचा खर्च अपेक्षित आहे.

धुळे तालुक्यातील शेतकऱ्यांच्या हक्काच्या पाण्यासाठी मंत्रालयीन स्तरावर देखील आपला पाठपुरावा अविरत सुरू राहील, असे माजी आमदार कुणाल पाटील यांनी शेवटी स्पष्ट केले.