गोंधळ’ ऑस्करला जाणार, पण कैलास वाघमारे इथपर्यंत कसा पोहोचला? संघर्षाची कहाणी वाचाच

99व्या अकादमी पुरस्कारांसाठी 'गोंधळ' या मराठी चित्रपटाची भारताची अधिकृत प्रवेशिका म्हणून निवड झाली आहे. 33 चित्रपटांना मागे टाकत 'बेस्ट इंटरनॅशनल फीचर फिल्म' श्रेणीत निवड झाल्याने मराठी सिनेसृष्टीसाठी ही अभिमानाची बाब आहे. या यशामुळे अभिनेता कैलास वाघमारेचा भाषा आणि दिसण्यावरून आलेल्या संघर्षाचा प्रवास चर्चेत आला आहे.

तब्बल 33 चित्रपटांमधून बाजी मारत ‘गोंधळ’ या मराठी चित्रपटाची 99व्या अकादमी पुरस्कारांसाठी अर्थात ऑस्कर 2027 साठी भारताची अधिकृत प्रवेशिका म्हणून निवड झाली आहे. मोठ्या व्यावसायिक यशाची नोंद करणाऱ्या चित्रपटांसह अनेक चर्चेत असलेल्या सिनेमांना मागे टाकत ‘गोंधळ’ने ही मानाची संधी मिळवली आहे. फिल्म फेडरेशन ऑफ इंडियाने याबाबत अधिकृत घोषणा केली. ‘बेस्ट इंटरनॅशनल फीचर फिल्म’ या श्रेणीत भारताचं प्रतिनिधित्व करण्यासाठी ‘गोंधळ’ची निवड झाल्याने संपूर्ण चित्रपटाच्या टीमवर अभिनंदनाचा वर्षाव होत आहे. मराठी चित्रपटसृष्टीसाठीही ही अभिमानाची बाब मानली जात आहे. ‘गोंधळ’च्या ऑस्करवारीमुळे मराठी सिनेसृष्टीचं नाव पुन्हा एकदा आंतरराष्ट्रीय व्यासपीठावर पोहोचलं आहे.

दिग्दर्शक संतोष डावखर यांच्या या चित्रपटात किशोर कदम, इशिता देशमुख, योगेश सोहोनी, निषाद भोईर, अनुज प्रभू, सुरेश विश्वकर्मा, माधवी जुवेकर, ऐश्वर्या शिंदे, कैलास वाघमारे, प्रभाकर मठपती, विठ्ठल काळे, प्रवीण डाळींबकर, शरद जाधव, पूनम पाटील आणि प्रशांत देशपांडे यांच्या प्रमुख भूमिका आहेत. चित्रपटाच्या ऑस्करवारीची बातमी समोर आल्यानंतर कलाकारांमध्येही आनंदाचं वातावरण आहे. चाहत्यांमध्येही ‘गोंधळ’बद्दल उत्सुकता वाढली आहे. चित्रपटातील अभिनेता कैलास वाघमारे यानेही सोशल मीडियावर ‘गोंधळ’मधील काही खास फोटो शेअर करत या निवडीबद्दल आनंद व्यक्त केला. त्याने आपल्या पोस्टमध्ये लिहिलं, “आपल्या महाराष्ट्राच्या मातीतला ‘गोंधळ’ ऑस्करच्या शर्यतीत! ९९व्या अकादमी पुरस्कारांसाठी भारताकडून अधिकृत निवड ❤️” कैलासच्या या पोस्टवर चाहत्यांनी आणि कलाकारांनी मोठ्या प्रमाणात प्रतिक्रिया दिल्या. अनेकांनी त्याच्या अभिनयाचं आणि आजवरच्या प्रवासाचं कौतुक केलं.