धुळ्यात रिपब्लिकन सेनेचे महाराष्ट्र राज्य मार्ग परिवहन महामंडळाच्या (एस.टी.) भ्रष्टाचार कारभार विरोधात 'बेमुदत भजने धरणे आंदोलन'; २४ तासांत दखल न घेतल्यास आझाद मैदानात तीव्र आंदोलनाचा इशारा

 धुळ्यात रिपब्लिकन सेनेचे 'बेमुदत भजने धरणे आंदोलन'; २४ तासांत दखल न घेतल्यास आझाद मैदानात तीव्र आंदोलनाचा इशारा

धुळे: जिल्हा प्रशासनाने  विविध तक्रारींवर कोणतीही कारवाई न केल्याच्या निषेधार्थ रिपब्लिकन सेनेतर्फे धुळ्यातील क्युमाईन क्लब, जेल रोड येथे गेल्या ७ मे पासून सुरू असलेल्या 'बेमुदत भजने धरणे आंदोलना'ची स्थानिक प्रशासनाने अद्याप दखल घेतलेली नाही. या पार्श्वभूमीवर, निवेदन प्राप्त झाल्यापासून २४ तासांच्या आत प्रशासनाने ठोस पावले न उचलल्यास मुंबईतील ऐतिहासिक आझाद मैदानावर तीव्र आंदोलन छेडण्यात येईल, असा इशारा रिपब्लिकन सेनेचे धुळे जिल्हाध्यक्ष समाधान विक्रम बैसाणे यांनी दिला आहे. यासंदर्भातील सविस्तर निवेदन जिल्हाधिकारी कार्यालयाला सादर करण्यात आले आहे.

प्रशासनाच्या ढिसाळ कारभाराविरोधात 'भजन आंदोलन'

रिपब्लिकन सेनेच्या वतीने एस टी परिवहन महामंडळाच्या  धुळे जिल्हा विभागांमधील गैरव्यवहार आणि अधिकाऱ्यांच्या मनमानी कारभाराविरोधात वेळोवेळी लेखी तक्रारी दाखल करण्यात आल्या होत्या. मात्र, स्थानिक प्रशासकीय अधिकारी व कर्मचाऱ्यांनी या तक्रारींची कोणतीही दखल न घेतल्यामुळे पक्षाच्या वतीने ७ मे २०२६ पासून सकाळी ८:०० वाजेपासून क्युमाईन क्लब, जेल रोड येथे अनोखे सांस्कृतिक 'भजने धरणे आंदोलन' सुरू करण्यात आले आहे. आंदोलन सुरू होऊन अनेक दिवस उलटले तरीही स्थानिक प्रशासन किंवा महाराष्ट्र राज्य मार्ग परिवहन महामंडळाच्या (एस.टी.) वरिष्ठ अधिकाऱ्यांनी आंदोलकांची भेट घेतलेली नाही.

निवेदनातील प्रमुख मागण्या आणि तक्रारी:

१. वाहतूक अधिकाऱ्यांच्या मनमानी कारभाराची चौकशी: धुळे येथील पद विभागीय वाहतूक अधिकारी . सौरभ राजेंद्र देवरे यांच्या मनमानी कारभाराची, वाहनांच्या संशयास्पद मार्ग तपासणीची तसेच वाहनांचा वापर आणि एस.टी. महामंडळाच्या नियमांचे उल्लंघन केल्याप्रकरणी सखोल चौकशी करून त्यांच्यावर निलंबनाची कारवाई करण्यात यावी.

२. आचारसंहिता काळातील बदल्यांची चौकशी: महानगरपालिका सार्वत्रिक निवडणूक २०२५-२६ च्या आचारसंहिता काळात नियमबाह्य पद्धतीने करण्यात आलेल्या जिल्हा आगार बदल्यांची चौकशी व्हावी.

३. नियमबाह्य तोंडी बदल्यांचा मुद्दा: धुळे येथील पद वाहतूक निरीक्षक श्री. तेजस संजय जोशी यांच्या कार्यकाळातील नियमबाह्य लेखी व तोंडी बदल्यांबाबत न्याय मिळावा. हे प्रकरण सध्या राज्य माहिती आयोगाकडे द्वितीय अपीलात प्रविष्ट आहे.

४. आरोग्य तपासणी योजनेतील भ्रष्टाचाराची चौकशी: एस.टी. महामंडळाच्या कर्मचाऱ्यांसाठी राबविण्यात आलेल्या 'धर्मवीर आनंद दिघे आरोग्य तपासणी' शासकीय योजनेत (सन २०२४-२५) मोठ्या प्रमाणावर आर्थिक गैरव्यवहार आणि भ्रष्टाचार झाल्याचा आरोप करत त्याची सखोल चौकशी करण्याची मागणी करण्यात आली आहे.

२४ तासांचा अल्टिमेटम; मुंबईत आंदोलनाचा इशारा

"आम्ही अत्यंत शांततापूर्ण आणि लोकशाही मार्गाने 'भजन आंदोलन' करत आहोत, परंतु प्रशासन आमच्या मागण्यांकडे जाणीवपूर्वक डोळेझाक करत आहे," असा आरोप जिल्हाध्यक्ष समाधान बैसाणे यांनी केला आहे. हे निवेदन मिळाल्यापासून २४ तासांच्या आत प्रशासनाने या गंभीर प्रकरणांची दखल घेतली नाही, तर पुढील होणाऱ्या सर्व संभाव्य परिणामांना स्थानिक प्रशासन, संबंधित कर्मचारी आणि महाराष्ट्र राज्य मार्ग परिवहन महामंडळाचे अधिकारी सर्वस्वी जबाबदार राहतील, असे निवेदनात स्पष्ट करण्यात आले आहे.

या निवेदनावर जिल्हाध्यक्ष समाधान विक्रम बैसाणे यांच्यासह कविताताई पाटील, शितल सैंदाणे, संजय सैंदाणे , शंकर देवरे, शशिकला मोरे, जानकीराम  कदम, अनिता सोनवणे आणि अमर सोनवणे आदी कार्यकर्त्यांच्या स्वाक्षऱ्या आहेत. या निवेदनाच्या प्रती माहितीसाठी विभागीय नियंत्रक (रा.प. विभाग, धुळे) आणि पोलीस निरीक्षक (धुळे शहर पोलीस स्टेशन) यांनाही पाठवण्यात आल्या आहेत.