धुळ्यात कचरा कंत्राटदाराकडून महापालिकेची कोट्यवधींची आर्थिक फसवणूक; शिवसैनिकांनी पोलिसांत दिली फिर्याद

धुळे: शहरातील कचरा संकलनाचे वजन वाढवून धुळे महानगरपालिकेची लाखो-कोट्यवधी रुपयांची आर्थिक फसवणूक केली जात असल्याचा खळबळजनक आरोप शिवसेनेच्या (उद्धव बाळासाहेब ठाकरे) वतीने करण्यात आला आहे. कचऱ्याऐवजी ट्रॅक्टर आणि गाड्यांमध्ये माती, दगड-धोंडे भरून हा गैरप्रकार केला जात असल्याचे समोर आले आहे. याप्रकरणी संबंधित भाग्यदीप्स वेस्ट मॅनेजमेंट' कंपनी आणि त्यांना पाठीशी घालणाऱ्या महापालिकेच्या अधिकाऱ्यांवर तातडीने फसवणुकीचा गुन्हा दाखल करावा, या मागणीसाठी शिवसैनिकांनी धुळे शहर पोलीस ठाण्यात रीतसर फिर्याद दिली आहे.

यावेळी शिवसेनेचे जिल्हाप्रमुख अतुल सोनवणे, उपजिल्हाप्रमुख नरेंद्र परदेशी, महानगर प्रमुख धीरज पाटील, तेजस गोटे, संदीप सूर्यवंशी आणि प्रशांत ठाकूर आदी पदाधिकारी व कार्यकर्ते मोठ्या संख्येने उपस्थित होते.

वार्षिक १८ कोटींचा ठेका; निम्मीच वाहने रस्त्यावर

धुळे महानगरपालिकेने पुणे येथील 'भाग्यदीप्स वेस्ट मॅनेजमेंट' या कंपनीला वार्षिक १८ कोटी रुपये दराने शहरातील ओला व सुका कचरा उचलून डेपोवर टाकण्याचा ठेका दिला आहे. नियमानुसार कंत्राटदाराने १०० घंटागाड्या, ३६ ट्रॅक्टर, १ पोकलँड आणि १ डंपर अशी वाहने वापरणे बंधनकारक आहे. मात्र, प्रत्यक्षात कंत्राटदार यापैकी अवघ्या निम्म्याच वाहनांद्वारे कचरा संकलन करत असल्याचा आरोप शिवसेनेने केला आहे.

कचऱ्याच्या वजनात 'असा' होतोय कोट्यवधींचा झोल

शिव सेनेने पोलिसांत दिलेल्या तक्रारीत या भ्रष्टाचाराची संपूर्ण कार्यपद्धती (मोडस ऑपरेंडी) स्पष्ट केली आहे:

* **जास्तीचे वजन दाखवणे:** शहरात दररोज २०८ टन कचरा संकलनाचा ठेका असताना, कंत्राटदार आणि मनपाचे काही अधिकारी संगनमताने रोज तब्बल २६० ते २७० टन वजन दाखवून पालिकेची दिशाभूल करत आहेत.

* **ओल्या-सुक्या कचऱ्याचा खेळ:** सुक्या कचऱ्याचा दर जास्त आणि ओल्या कचऱ्याचा दर कमी आहे. याचा फायदा घेण्यासाठी कंत्राटदार जाणीवपूर्वक ओला कचरा केवळ २५ ते ३० टन दाखवतो (जो वास्तवत: १०० टनांपेक्षा जास्त असणे आवश्यक आहे), तर सुका कचरा तब्बल २३० ते २४० टन दाखवला जात आहे.

बिलांसाठी मातीची भरती:सुक्या कचऱ्याचे वजन वाढवण्यासाठी कचऱ्यामध्ये माती आणि बांधकामाचे मटेरियल भरून दिवसाढवळ्या पालिकेची फसवणूक केली जात आहे.

शिवसैनिकांनी कंत्राटदाराला पाडले रंगेहाथ; व्हिडिओ व्हायरल

तक्रारीनुसार, गेल्या २ महिन्यांत कंत्राटदार तब्बल ४ ते ५ वेळा माती भरताना रंगेहाथ पकडला गेला आहे:

१. **१७ एप्रिल २०२६** रोजी मनपा नगरसेवक धीरज परदेशी यांनी कचरा ठेकेदाराचे कर्मचारी ट्रॅक्टरमध्ये माती भरत असताना त्यांना जाब विचारला व याचा व्हिडिओ फेसबुकवर प्रसिद्ध केला होता.

२. स्थायी समितीच्या सभेत कृपेश नांद्रे यांनीही या गंभीर विषयावर आवाज उठवला होता.

३. शिवसेना पदाधिकारी संदीप सूर्यवंशी** यांनी शिवतीर्थाच्या मागे कर्मचाऱ्यांना माती भरताना रंगेहाथ पकडले. "ठेकेदारानेच वजन वाढवण्यासाठी माती भरायला सांगितली आहे," अशी कबुली देणाऱ्या कर्मचाऱ्यांचा व्हिडिओ सोशल मीडियावर जोरदार व्हायरल झाला आहे.

४. **बुधवारी (२० मे)पुन्हा गरुड कॉम्प्लेक्स परिसरात ट्रॅक्टरमध्ये दगड-माती भरताना शिवसैनिकांनी कर्मचाऱ्यांना रंगेहाथ पकडल्याचा दावा केला आहे.

जनतेच्या पैशांवर डल्ला!

कंत्राटदाराला दरमहा सुमारे **४.९५ लाख रुपयांचे बिल** अदा केले जाणार आहे. मात्र, एवढा मोठा खर्च होऊनही शहरातील कचरा कमी झालेला नाही. जागोजागी कचऱ्याचे ढीग साचल्याने नागरिकांच्या आरोग्याचा प्रश्न निर्माण झाला आहे. हा थेट जनतेच्या कराच्या पैशांवर मारलेला डल्ला असून, यात दोषी असलेल्या कंत्राटदारावर आणि संबंधित महापालिका अधिकाऱ्यांवर तात्काळ फौजदारी गुन्हा दाखल करावा, अशी आक्रमक मागणी शिवसेनेने लावून धरली आहे.