सुपर लीगमध्ये धुळे जिल्हा क्रिकेट संघाचा दमदार विजय; पवन अग्रवालची १४९ धावांची तुफानी खेळी

धुळे | प्रतिनिधी

महाराष्ट्र क्रिकेट असोसिएशनतर्फे आयोजित १६ वर्षांखालील सुपर लीग क्रिकेट स्पर्धेत धुळे जिल्हा क्रिकेट संघाने शानदार कामगिरी करत विजयी सलामी दिली. पुण्यातील गहुंजे येथील आंतरराष्ट्रीय स्टेडियमवर झालेल्या अटीतटीच्या सामन्यात धुळे संघाने यजमान स्पार्क क्रिकेट क्लबवर पहिल्या डावातील ७ धावांच्या आघाडीच्या जोरावर विजय मिळवला.

या सामन्यात सलामीवीर पवन अग्रवाल याने १४९ धावांची दमदार आणि संयमी खेळी करत मैदान गाजवले. त्याच्या शानदार फलंदाजीमुळे धुळे संघाला भक्कम धावसंख्या उभारता आली. कर्णधार देवेन वाघ याच्या भेदक गोलंदाजीने प्रतिस्पर्धी संघावर दबाव निर्माण केला आणि संघाच्या विजयात मोलाचा वाटा उचलला.

प्रशिक्षकांच्या अचूक व्यूहरचनेमुळे आणि खेळाडूंच्या उत्कृष्ट समन्वयामुळे धुळे संघाने सामन्यावर पकड कायम ठेवली. फलंदाजी, गोलंदाजी आणि क्षेत्ररक्षण या तिन्ही विभागात संघाने प्रभावी प्रदर्शन करत प्रेक्षकांची दाद मिळवली.

या विजयामुळे धुळे जिल्हा क्रिकेट वर्तुळात उत्साहाचे वातावरण निर्माण झाले असून आगामी सामन्यांसाठी खेळाडूंचा आत्मविश्वास उंचावला आहे. क्रिकेटप्रेमींनी संघाच्या या यशाबद्दल अभिनंदनाचा वर्षाव केला आहे.