Dhule Crime: जुन्या वादातून दोन गटांत धुमश्चक्री; धारदार शस्त्रांनी हाणामारी, गोळीबाराने नागरिकांमध्ये दहशत

जुना वाद पुन्हा उफाळला आणि भर बाजारपेठेत दोन गट आमनेसामने आले. काही क्षणांतच धारदार शस्त्रे बाहेर आली अन् हवेत चार राऊंड फायर झाल्याने परिसरात एकच खळबळ उडाली.

मनोहर चित्रमंदिर परिसरात दोन गट आमनेसामने

धारदार शस्त्रांनी हाणामारी; हवेत चार राऊंड फायर

सीसीटीव्ही तपासणी; संशयितांच्या शोधासाठी पोलिसांची पथके रवाना

धुळे : शहरातील गजबजलेल्या जुना आग्रा रोडवरील मनोहर चित्रमंदिर परिसरात जुन्या वादातून दोन गटांमध्ये जोरदार हाणामारी झाल्याची घटना घडली. या धुमश्चक्रीदरम्यान संशयितांनी हवेत तब्बल चार राऊंड फायरिंग केल्याने परिसरात एकच खळबळ उडाली. भर बाजारपेठेत घडलेल्या या घटनेमुळे नागरिकांमध्ये भीतीचे वातावरण निर्माण झाले. घटनेची माहिती मिळताच पोलिसांनी घटनास्थळी धाव घेत परिस्थिती नियंत्रणात आणली. मिळालेल्या माहितीनुसार, जुना आग्रा रोड हा धुळे शहरातील प्रमुख आणि कायम गजबजलेला परिसर आहे. मनोहर चित्रमंदिराजवळ दोन गटांतील तरुण आमनेसामने आले. या दोन्ही गटांमध्ये मागील काही काळापासून जुना वाद सुरू असल्याची माहिती आहे. याच वादातून त्यांच्यात सुरुवातीला शाब्दिक बाचाबाची झाली. काही वेळातच हा वाद वाढत गेला आणि दोन्ही गटांमध्ये हाणामारी सुरू झाली.

धारदार शस्त्रे बाहेर काढली

हाणामारीदरम्यान दोन्ही गटांतील काही तरुणांनी धारदार शस्त्रे बाहेर काढल्याचे प्रत्यक्षदर्शींनी सांगितले. भर बाजारपेठेत अचानक सुरू झालेल्या या धुमश्चक्रीमुळे खरेदीसाठी आलेल्या नागरिकांमध्ये घबराट पसरली. नागरिकांनी सुरक्षित ठिकाणी जाण्यासाठी धावपळ केली. काही काळ परिसरात तणावाचे वातावरण निर्माण झाले. याचदरम्यान काही संशयितांनी हवेत चार राऊंड फायरिंग केल्याची माहिती समोर आली आहे. गोळीबाराचा आवाज ऐकून परिसरातील नागरिक हादरले. दहशत निर्माण करण्याच्या उद्देशाने हा गोळीबार करण्यात आल्याचा संशय व्यक्त केला जात आहे. या घटनेमुळे शहरातील कायदा-सुव्यवस्थेचा प्रश्न पुन्हा ऐरणीवर आला आहे.

पोलिसांची घटनास्थळी धाव

घटनेची माहिती मिळताच धुळे शहर पोलिसांचे पथक तातडीने मनोहर चित्रमंदिर परिसरात दाखल झाले. पोलिसांनी घटनास्थळाची पाहणी करून परिस्थिती नियंत्रणात आणली. गोळीबार नेमका कोणत्या कारणातून झाला, याबाबत अद्याप स्पष्ट माहिती समोर आलेली नाही. मात्र, प्राथमिक तपासात मागील जुन्या वादातूनच हाणामारी आणि गोळीबाराचा प्रकार घडल्याचा अंदाज पोलिसांनी व्यक्त केला आहे. या प्रकरणी धुळे शहर पोलीस ठाण्यात संशयित आरोपींविरुद्ध विविध कलमांन्वये गुन्हा दाखल करण्यात आला आहे. पोलिसांकडून परिसरातील सीसीटीव्ही कॅमेऱ्यांचे फुटेज तपासले जात आहे. तसेच गोळीबार करणाऱ्या संशयितांची ओळख पटवून त्यांना ताब्यात घेण्यासाठी पोलिसांची पथके रवाना करण्यात आली आहेत. या घटनेमागील नेमके कारण आणि सहभागी आरोपींची भूमिका तपासानंतर स्पष्ट होणार आहे.